Lehendakariaren agurra

Batzarkide estimatua,

Lekutxo honetatik zuzentzen natzaizue hain geure sentitzen dugun Gipuzkoako Entrenatzaile Batzordeko lehendakari gisa neure burua zuen zerbitzura jarriaz.

Jakin badakit zer nolako ardura den zuen denon eta egiten duzuen lan eskergaren ordezkari izatea eta dudarik gabe beti defendatuko dugu entrenatzaile gipuzkoarraren egitekoa eta ohorea.

Askotan esan dut entrenatzaile gipuzkoarrok berezkoa dugun nortasuna, bikain barneraturik ditugun ezaugarrietatik datorrela, hots, zintzotasuna, besteekiko kezka, gardentasuna edota erantzukizun soziala bezalako balioak dira geureak. Ez gara bide horretatik urrundu behar eta horretarako batzorde funtzional eta adeitsu bat eduki behar dugu, entrenatzaileengandik eta, gehienbat, entrenatzaileentzako lan egiten duena.

Estamentu eta modalitate ezberdinak zarete ongi etorriak geure txoko xume honetara, hala nola atezainen entrenatzaile, prestatzaile fisiko, analista edota tekniko mota ugariak eta noski, ez ditut atzean utzi nahi geure adiskide eta kide diren Areto Futboleko teknikari bikainak.

Zuentzat denontzat da, beraz, gure gune birtual hau. Bertan geure batzordearekin zerikusia duen informazioa eta albisteak aurkituko dituzue eta, noski, bakoitzaren erabiltzaile pribatura sartzeko modua ere izango duzue. Beraz, eta dakizuen bezala, zuen zerbitzura nago edozein iradokizun, kontu edota mahai gainean jarri nahi den eskakizunetarako.

Plazer hutsa da niretzat eta mila esker guztioi bidelagun izateagatik.

Agur bero bat

Josu Zubia
Lehendakaria